ഒരു ഗ്രൈൻഡർ വാങ്ങാൻ പോയ കഥ.

<script async src="https://pagead2.googlesyndication.com/pagead/js/adsbygoogle.js?client=ca-pub-6566305144876909"
     crossorigin="anonymous"></script>

പ്രേത്യേകിച് ഒന്നും ചെയ്യാൻ ഇല്ലാത്ത ഒരു വെള്ളിയാഴ്ച വൈകുന്നേരം, ചുമ്മാ ഷോപ്പിംഗ് മാളിൽ കറങ്ങി നടക്കുകയായിരുന്നു കഥാ നായകനും നായികയും 👫.  നടന്നു നടന്നു carrefourനു മുൻപിൽ എത്തിയപ്പോൾ  കഥാ നായകന്  ഒരു വെളിപാട്... ഒരു ഗ്രൈൻഡർ വാങ്ങിയാലോ?  3അംഗങ്ങൾ  മാത്രം ഉള്ള കൊച്ചു  കുടുബത്തിനു മിക്സി തന്നെ  ധാരാളം എന്നിരിക്കെ ഗ്രൈൻഡറിൽ അരച്ചാൽ  പരിപ്പുവടക്കും ഉഴുന്നുവടക്കും കറക്റ്റ് പരുവത്തിനുള്ള മാവ് കിട്ടും എന്ന ചിന്തയാണ് കഥാനായകനെ ഗ്രൈൻഡർ വാങ്ങാം എന്ന തീരുമാനത്തിൽ എത്തിച്ചത്. എന്നാൽ അങ്ങനെ ആകട്ടെ എന്ന് നായികയും. പിന്നെ ഒട്ടും താമസിച്ചില്ല നേരെ വെച്ച് പിടിച്ചു home appliance സെക്ഷനിലേക്ക്.

ഷെൽഫുകൾ  അരിച്ചു പെറുക്കിയിട്ടും ഗ്രൈൻഡർ മാത്രം കണ്ടില്ല.  എന്നാൽ ഇനി സെയിൽസ് മാനോട് ചോദിച്ചേക്കാം എന്ന് മനസ്സിൽ ഓർത്തതും അതാ ആളെത്തി .. ആള്  മലയാളി തന്നെ. ഓ അപ്പൊ ഗ്രൈൻഡർ പറഞ്ഞാൽ അറിയാതിരിക്കില്ല.

കഥാനായകൻ ആവേശത്തോടെ ചോദിച്ചു  'ഗ്രൈൻഡർ ഉണ്ടോ?'. 

ഓ  ഇത്രേം നേരം ഇവിടെ കിടന്നു കറങ്ങിട്ടും എന്താ നിങ്ങൾ  ഗ്രൈൻഡർ കണ്ടില്ലേ എന്ന ഭാവത്തിൽ  അയാൾ നായകന്റെ  പുറകിലെ ഷെൽഫിലേക്ക്   കൈ ചൂണ്ടി 'ദാ  ഇരിക്കുന്നു'. ആ ഷെൽഫിൽ പല ബ്രാൻഡ് മിക്സികൾ നിരത്തി വെച്ചിട്ടുണ്ട്.

'അത് മിക്സി അല്ലെ ഞങ്ങൾക്ക് ഗ്രൈൻഡർ ആണ് വേണ്ടത്' എന്നു നായിക.

'മിക്സി തന്നെ ആണ് മാഡം ഗ്രൈൻഡർ' എന്നു സെയിൽസ് മാൻ. അല്ല ഗ്രൈൻഡർ വേറെയാണ് എന്ന് പറഞ്ഞ നായികക്കു അയാൾ ഫുഡ് പ്രൊസസർ, ഡൗ മേക്കർ തുടങ്ങിയവ കാണിച്ചുകൊടുത്ത് ഗുണഗണങ്ങൾ വിവരിച്ചു.

ക്ഷമ നശിച്ച നായകൻ കുറച്ചു കൂടി വിശദമാക്കി 'ഇഡലിക്ക് അരി ഉഴുന്ന് അരക്കില്ലേ ആ ഗ്രൈൻഡർ ആണ് ചോദിക്കുന്നത്'. 

ഓ അങ്ങനെ പറയണ്ടേ ഇപ്പൊ പിടി കിട്ടി എന്ന ഭാവത്തിൽ സെയിൽസ് മാൻ പറഞ്ഞു ... 'ആ അതിന്റെ  ഇലക്ട്രിക്കിൽ വർക്ക് ചെയുന്നത് വരുന്നില്ല'.  

'പിന്നെ?' 😳😳നായകനും നായികയും ഒരു പോലെ കണ്ണുമിഴിച്ചു.  

'കൈകൊണ്ട് അരക്കുന്നത് വരുന്നുണ്ട്'

നായകനും നായികയും മിഴിഞ്ഞ കണ്ണുകൾ ഒന്നുകൂടെ പുറത്തേക്കു തള്ളി ഒരേ സ്വരത്തിൽ ചോദിച്ചു 'ആട്ടു കല്ലോ?'. 😱😱
'അതെ,നാട്ടിലെ പോലെ വലുതല്ല. ചെറുത്.. പാത്രങ്ങൾ ഒക്കെ വെച്ചിരിക്കുന്ന ഷെൽഫിൽ ഉണ്ട്. ഇവിടെ വലുതൊന്നും ആരും ഉപയോഗിക്കില്ല. '
സെയിൽസ് മാന്റെ ആത്മാവ്ശ്വാസം കണ്ടു വിശ്വാസം വരാതെ... ആട്ടു കല്ലോ?? അതും ഇവിടെ ദുബായ് carrefourൽ എന്ന കുലംകഷമായ ചിന്തയോടെ 🤔🤔 നായകനും  നായികയും സെയിൽസ് മാന്റെ പുറകെ നടന്നു. ഒരു റാക്കിനു മുൻപിൽ എത്തിയപ്പോൾ "യുറേക്ക" എന്നു  മനസ്സിൽ പറഞ്ഞു അയാൾ 😎 നായകനും നായികക്കും ചെറിയ ആട്ടുകല്ല് കാണിച്ചു കൊടുത്തു. അതു കണ്ടു നായകന്റെ കണ്ണു നിറഞ്ഞു 😥..... നായികക്കാണെകിൽ ആ ആട്ടു കല്ലിൽ അരിം ഉഴുന്നും അരക്കുന്ന കാര്യം ആലോചിച്ചിട്ട് ചിരി അടക്കാൻ കഴിഞ്ഞില്ല. 😂🤣 സെയിൽസ് മാനെ  നോക്കി നിറുത്താതെ ചിരിച്ചു. 
സെയിൽസ് മെൻ കിലുക്കം സിനിമയിലെ രേവതിയേ പോലെ "ഞാൻ ഇത്രയല്ലേ ചെയ്തുള്ളു. വേറെ ഒന്നും ചെയ്തില്ലലോ??" 👱 എന്ന ഭാവത്തിൽ അമ്പരന്നു നിന്നു .  ഇഞ്ചിയും ഉള്ളിയും ചതക്കാൻ ഉപയോഗിക്കുന്ന കൊച്ചു ഉരൽ ആണ് അയാൾ കാണിച്ചു കൊടുത്ത മിനി ആട്ടുകല്ല്.  ഇത് വാങ്ങി ഇയാളേം കൊണ്ട് വീട്ടിൽ പോയി ഇതിൽ അരിയും ഉഴുന്നും അരപ്പിച്ചു ഇഡ്‌ഡലി ഉണ്ടാക്കിക്കണം  എന്ന് പിറുപിറുത്തു കൊണ്ട് നിർത്താതെ ചിരിക്കുന്ന നായികയെയും വലിച്ചോണ്ടു നായകൻ രംഗം വിട്ടു. 🏃🏃‍♀️ 

ഒരു സംഭവ കഥ. 

അരങ്ങു : Carrefour,  Dragonmart 2,  Dubai.

വാഫി സിറ്റി

വാഫി സിറ്റി - ദുബായിലെ കാണേണ്ട ഷോപ്പിംഗ്‌ മാളുകളില്‍് ഒന്നാണ്. ചില ചിത്രങ്ങള്‍ ഇതാ..

(ഈ മാള്ളിന്‍റെ യഥാര്‍ത്ത ഭംഗി അറിയണമെങ്കില്‍ ഫോട്ടോ എടുക്കാന്‍ അറിയുന്നവര്‍ എടുക്കണമായിരുന്നു. ഫോട്ടോഗ്രാഫിയുടെ ബാലപാഠം പോലും അറിയാത്ത എന്നെകൊണ്ട് ഇത്രയൊക്കെയേ സാധിച്ചുള്ളൂ.)

അമൂല്യ വസ്തു...

2 വര്‍ഷം മുന്‍പ് വെക്കേഷന് നാട്ടില്‍ പോയി മടങ്ങുമ്പോള്‍ ഇവിടെയുള്ള ഒരു സുഹൃത്തിനു കൊടുക്കാനായി അയാളുടെ വീട്ടില്‍ നിന്ന് കുറച്ചു സാധനങ്ങള്‍ തന്നു വിട്ടു. ഒരു പാക്കറ്റില്‍ പിക്കിള്‍, ബീഫ് വരട്ടിയത്, ചിപ്സ് ഒക്കെയാണെന്ന് പറഞ്ഞു. അത് കൂടാതെ ഒരു ചെറിയ പൊതി ഉണ്ടായിരുന്നു. കണ്ടാല്‍ ഒരു പെന്‍ ചെറിയ ബോക്സില്‍ പായ്ക്ക് ചെയ്തതുപോലെ തോന്നും. വീട്ടുക്കാര്‍ പ്രത്യേകം പറഞ്ഞു ഭക്ഷണ സാധനങ്ങള്‍ ഉള്ള പാക്കറ്റ് എത്തിച്ചില്ലെങ്കിലും ഈ ചെറിയ പാക്കറ്റ് മറക്കാതെ അവനു കൊടുക്കണം, കളഞ്ഞു പോകാതെ സൂക്ഷിക്കണം എന്നൊക്കെ. ഞങ്ങള്‍ കരുതി എന്തോ വിലപിടിച്ച വസ്തു ആണെന്ന്. അത് കൊണ്ട് തന്നെ ഞാന്‍ അത് ഹാന്‍ഡ് ബാഗിലാണ്‌ വെച്ചത്. ഞങ്ങള്‍ ഇവിടെ തിരിച്ചെത്തിയ അന്ന് വൈകീട്ടു തന്നെ പുള്ളിക്കാരന്‍ നാട്ടില്‍ നിന്ന് തന്നുവിട്ട സാധനങ്ങള്‍ വാങ്ങിക്കാന്‍ വന്നു. ആദ്യം വലിയ പാക്കറ്റ് എടുത്തു കൊടുത്തു. ഇതില്‍ അച്ചാറും, ഇറച്ചിയുമൊക്കെ ആകും നിങ്ങളും എടുത്തോള്ളൂ എന്ന് പറഞ്ഞു പുള്ളിക്കാരന്‍ ആ പാക്കറ്റ് എന്‍റെ നേരെ നീട്ടി. നാട്ടില്‍ പോയി എല്ലാം കഴിച്ചു വന്നതല്ലേ ഉള്ളു ഞങ്ങളും നാട്ടില്‍ നിന്ന് എല്ലാം കൊണ്ട് വന്നിട്ടുണ്ട് എന്ന് പറഞ്ഞു ഞാന്‍ അത് സ്നേഹപൂര്‍വ്വം നിരസിച്ചു. ഞാന്‍ വേഗം ചെറിയ പാക്കറ്റ് എടുത്തു കൊടുത്തിട്ട് പറഞ്ഞു ഇതു ഭദ്രമായി കൊണ്ടുതരണം എന്ന് വീട്ടുക്കാര്‍ പ്രത്യേകം പറഞ്ഞിരുന്നു എന്ന്. പുള്ളിക്കാരന്‍ ഒരു ചമ്മിയ ചിരി പാസ്സാക്കിയിട്ടു ആ പാക്കറ്റ് വാങ്ങി. അത് വരെ അടക്കി വെച്ചിരുന്ന ആകാംക്ഷക്ക് തിരശീലയിട്ടുകൊണ്ട് പുള്ളിക്കാരന്‍ ആ പാക്കറ്റ് തുറന്നു. ഞങ്ങള്‍ക്ക് ചിരിയടക്കാന്‍ കഴിഞ്ഞില്ല. വീട്ടുക്കാര്‍ ഇത്രയും ഭംഗിയായി പായ്ക്ക് ചെയ്തു തന്നുവിട്ട, ഞാന്‍ ഹാന്‍ഡ് ബാഗില്‍ വെച്ച് ഭദ്രമായി ഇവിടെ എത്തിച്ച ആ അമൂല്യ വസ്തു എന്തായിരുന്നു എന്നറിയുമ്പോള്‍ ആരായാലും ചിരിച്ചു പോകും. അത് വെറും കോഴിപപ്പായിരുന്നു. (ഞങ്ങളുടെ നാട്ടില്‍ അങ്ങനെയാണ് പറയുക. കുറച്ചു കൂടി ആലങ്കാരികമായി പറഞ്ഞാല്‍ കോഴി തൂവല്‍. ) ഞങ്ങളുടെ ചിരികണ്ട് നിസഹായ ഭാവത്തോടെ പുള്ളിക്കരന്‍ പറഞ്ഞു 'എനിക്ക് കോഴിത്തൂവല്‍ ചെവിയിലിട്ടാലെ ശരിയാകൂ ഈ ബട്സ് ഒന്നും നമ്മുക്ക് പറ്റില്ല. ഞാന്‍ ഇവിടെ കൊറേ അന്വേഷിച്ചു. കിട്ടിയില്ല. അതാണ് നാട്ടില്‍ നിന്നും കൊടുത്തു വിടാന്‍ പറഞ്ഞത്.'

നാട്ടിലല്ലെങ്കിലും നമ്മളില്‍ ചില മലയാളികള്‍ക്ക് ശീലങ്ങള്‍ മറ്റാന്‍ പറ്റുമോ???

വിഷു 2009.

കണി വെക്കാന്‍ സാധനങ്ങള്‍ മേടിക്കാന്‍ തിങ്കളാഴ്ച വൈകുന്നേരം ഇവിടെ ലുലുവില്‍ പോയപ്പോള്‍ തൃശൂര്‍ പൂരത്തിന്‍റെ അത്രേം തിരക്ക്. വിഷു ഫ്ലവര്‍ എന്ന് എഴുതിയ ഒരു ബോര്‍ഡ് കണ്ടു പക്ഷെ അതിനടിയില്‍ വെച്ചിരിക്കുന്ന കുട്ട കാലിയായിരുന്നു. അവിടെ കൂടി നിന്നിരുന്ന ചിലര്‍ പറഞ്ഞു കൊന്ന പൂ വേണമെങ്കില്‍ ഇവിടെ നിന്നോളു സേയില്‍സ് മാന്‍ എടുക്കാന്‍ പോയിട്ടുണ്ട് എന്ന്. പറഞ്ഞത് പോലെ കുറച്ചു കഴിഞ്ഞപ്പോള്‍ സേയില്‍സ് മാന്‍ ഒരു കുട്ടയില്‍ കൊന്ന പൂ പാക്കറ്റ്കളുമായി വന്നു. കണടച്ചു തുറക്കുന്ന സമയം കൊണ്ടല്ലെ അത് സംഭവിച്ചതു. ചുറ്റും നിന്ന് കൊറേ കൈകള്‍ നീണ്ടു വരുന്നത് മാത്രം കണ്ടു സേയില്‍സ് മാന്‍ അതാ നില്‍ക്കുന്നു കാലി കുട്ടയുമായി. കണി വെക്കാന്‍ കൊന്ന വേണമെങ്കില്‍ കൈക്കരുത്തു വേണമെന്ന് മനസിലാക്കിയ ഞാന്‍ പതുക്കെ ഭര്‍ത്താവിനെ അതിനായി നിയോഗിച്ചുകൊണ്ട്‌ പച്ചകറികള്‍ എടുക്കാനായി നീങ്ങി. ഒരു വിധം പച്ചകറികളും പഴങ്ങളും കിട്ടി. പച്ച മാങ്ങാ ഇലയോട് കൂടി എടുക്കാന്‍ ഒരു മല്‍പിടുത്തം തന്നെ നടത്തേണ്ടി വന്നു. മത്തങ്ങയും ചേനയും കഷ്ണങ്ങളാക്കി ഇട്ടിരിക്കുന്നു. മുഴുവനോടെയല്ലേ കണി വെക്കുക. ഇനി ഇപ്പോ കഴിയാറായപ്പോള്‍ കഷ്ണങ്ങളാക്കിയതാണോ എന്നറിയില്ല. എന്തായാലും മുഴുവനോടെ ഉള്ളതെ കണിവെക്കൂ എന്ന തീരുമാനത്തില്‍ ഉറച്ചു നിന്നത് കൊണ്ട് മത്തങ്ങയും ചേനയും അവിടുന്ന് വാങ്ങിയില്ല. പച്ചകറികളും പഴങ്ങളും എടുത്തു ഞാന്‍ ചെല്ലുമ്പോഴേക്കും ഒരു പാക്കറ്റ് കൊന്ന പൂ കൈക്കലാക്കി വിജയശ്രീ ലാളിതനായി എന്‍റെ പതി നില്പുണ്ടായിരുന്നു. തിരിച്ചു വരുന്ന വഴിക്ക് ഒരു ചെറിയ ഗ്രോസറികടയില്‍ നിന്നും മത്തങ്ങയും ചേനയും സങ്കടിപിച്ചു. ചക്ക മാത്രം കിട്ടിയില്ല. ഒരു കടച്ചക്കയെങ്കിലും കിട്ടിയിരുന്നെങ്കില്‍....

എന്തായാലും കിട്ടിയ പച്ചകറികളും പഴങ്ങളും വെച്ച് ഞങ്ങള്‍ ചെറിയ രീതിയില്‍ ഒരു കണി ഒരുക്കി.
രാവിലെ എണീറ്റ്‌ കണികണ്ടു. കൈനീട്ടവും കിട്ടി.







സദ്യ എല്ലാവരും ചേര്‍ന്നായിരുന്നു. എല്ലാവരും എന്ന് പറഞ്ഞാല്‍ 5 ഫാമിലിയും 3 ബാച്ചിലേര്‍സും അടങ്ങുന്ന ഒരു വലിയ കൂട്ടുകുടുംബം. ഓരോ ഫാമിലിയും 2 വിഭവങ്ങള്‍ വീതം ഉണ്ടാക്കി കൊണ്ട് വന്നു ഒരുമിച്ചിരുന്നു സദ്യ ഉണ്ടു. ഞങ്ങളുടെ എല്ലാ ആഘോഷങ്ങളും ഇങ്ങനെയാണ്. ഇവിടെ അല്ലാതെ തനിച്ചു എന്ത് ആഘോഷം. അങ്ങനെ ഈ വര്‍ഷത്തെ വിഷുവും കഴിഞ്ഞു. ഈ മണലാരണ്യത്തില്‍ ഞങ്ങളും ചെറിയ തോതില്‍ വിഷു ആഘോഷിച്ചു.

UAE - എന്‍റെ കണ്ണുകളിലൂടെ....

സൗദി, കുവൈറ്റ്, ഒമാന്‍, ബഹറിന്‍, UAE എന്നിവയൊക്കെ വേറെ വേറെ രാജ്യങ്ങളാണെന്ന അറിവ് ഇപ്പോഴും പലര്‍ക്കും ഇല്ല. ഈ രാജ്യങ്ങളെല്ലാം ചേര്‍ത്ത് ഗള്‍ഫ് എന്ന ഒറ്റ പേരിലല്ലേ നമ്മള്‍ മലയാളികള്‍ക്ക് അറിയുമായിരുന്നുള്ളു ‍. കേരളമാണോ ഇന്ത്യയാണോ വലുത് എന്ന സംശയം അറബികള്‍ക്കിടയില്‍ ഉണ്ടാക്കിയ മിടുക്കരാണ് നമ്മള്‍.

UAE എന്ന് പറഞ്ഞാല്‍ പലര്‍ക്കും അറിയില്ല. എന്നാലോ ദുബായ്, ഷാര്‍ജ്ജ, അബുദാബി ഈ പേരുകള്‍ എല്ലാവര്‍ക്കും ഇപ്പോള്‍ സുപരിചിതമായിരിക്കും. നമ്മുടെ കേരളത്തിന്‍റെ ഇരട്ടി വലുപ്പം മാത്രം വരുന്ന, ഏകദേശം 78,700 കിലോമീറ്റര്‍ സ്ക്വയര്‍ വിസ്തൃതിയുള്ള ഒരു കൊച്ചു രാജ്യമാണ് UAE. അബുദാബി, അജ്മാന്‍, ദുബായ്, ഫുജൈറാ, റാസല്‍ഖൈമ, ഷാര്‍ജ്ജ, ഉമല്ഖൊയിന്‍ എന്നിങനെ 7 എമിറേറ്റുകള്‍ ഉള്‍പെടുന്ന ഒരു ഫെഡറേഷന്‍. വിസ്തൃതിയില്‍ കേരളത്തിന്‍റെ ഇരട്ടി ഉണ്ടെങ്കിലും ജനവാസപ്രദേശം കേരളത്തിന്‍റെ അത്രേം വരില്ല. എറിയ പങ്കും വിജനമായ മരുഭൂമിയാണ്.

7 എമിറേറ്റുകളില്‍ അബുദാബിയാണ് വിസ്തൃതിയില്‍ ഏറ്റവും വലുത്. ഏകദേശം 67340 കിലോമീറ്റര്‍ സ്ക്വയര്‍. മൊത്തം വിസ്തൃതിയുടെ മുക്കാല്‍ ഭാഗവും അബുദാബി എമിറേറ്റില്‍ ഉള്‍പ്പെടുന്നു. UAEടെ തലസ്ഥാന നഗരവും അബുദാബി തന്നെയാണ്. UAEലെ ഏറ്റവും വലിയ സിറ്റിയ്യായ ദുബായിടെ വിസ്തൃതി ഏകദേശം 4114 കിലോമീറ്റര്‍ സ്ക്വയറെ വരൂ. ഏറ്റവും ചെറിയ എമിറേറ്റ് അജ്മാനാണ്. വിസ്തൃതി ഏകദേശം 260 കിലോമീറ്റര്‍ സ്ക്വയര്‍. ഷാര്‍ജ്ജയാണ് വിസ്തൃതിയുടെ കാര്യത്തില്‍ മൂന്നാം സ്ഥാനത്ത് ഏകദേശം 2590 കിലോമീറ്റര്‍ സ്ക്വയര്‍. റാസല്‍ഖൈമ 1683 കിലോമീറ്റര്‍ സ്ക്വയര്‍, ഫുജൈറാ 1450 കിലോമീറ്റര്‍ സ്ക്വയര്‍, ഉമല്ഖൊയിന്‍ 777 കിലോമീറ്റര്‍ സ്ക്വയര്‍ എന്നിങനെ പോകുന്നു കണക്കുകള്‍.

2007ലെ സ്ഥിതിവിവര കണക്കുകള്‍ അനുസരിച്ച് UAEലെ മൊത്തം ജനസംഖ്യ 44,80,000 ആണ്. അതില്‍ 8,64,000 മാത്രേ ഇവിടുത്തെ ജനങള്‍ ഉള്ളു. 36,16,000 ജനങളും ഇന്ത്യക്കാര്‍ ഉള്‍പ്പടെയുള്ള വിദേശികളാണ്. UAEടെ പകുതി മാത്രം വിസ്തൃതിയുള്ള കേരളത്തിലെ ജനസംഖ്യ 3,18,38,619 ആണ്.